पर्सा गाउँपालिकामा स्कुल बस दुर्घटना हुँदा ३ विद्यार्थी घाइते

भदौ ०७ पर्सा । सर्लाहीको पर्सा गाउँपालिका वडा नं. ४ मा आज साँझ स्कुल बस दुर्घटना हुँदा ३ जना विद्यार्थी घाइते भएका छन् । पर्सा ४ मा रहेको मनकामना एकेडेमी बोर्डिङ स्कुलको मधेश प्रदेश ०३–००१ क २६१९ नम्वरको बस भित्री सडकमा दुर्घटनामा परेको हो । पर्सा गाउँपालिकाकै कविलासी भन्ने ठाउँबाट नारायणपुरतर्फ विद्यार्थीलाई घर पुर्याउन गएको बस कुलोमा चक्का भासिन गई कोल्टे परेको जिल्ला प्रहरी कार्यालय मलंगवाले जनाएको छ । दुर्घटनामा कविलासी नगरपालिका ३ बस्ने रुपेश साहको छोरा ९ वर्षका आदित्य कुमार साह, दिलीपकुमार साहका छोरा ५ वर्षका दक्ष साह र तौकिर अन्सारीका छोरा ६ वर्षका कौनेन अन्सारी घाइते भएका छन् । सामान्य घाइते तीनै जना बालकको स्थानीय स्वास्थ्य संस्थामा उपचार भएको छ । दुर्घटनामा परेको बस र त्यसका चालक प्रहरी चौकी नारायणपुरको नियन्त्रणमा रहेका छन् ।